Sylvia Park School

Ngā Mātāpono o Te Ako Ararau

Tērā tētehi āhuatanga ako ararau i puta i Te Puna Waiora e hāngai pū ana ki ngā mātāpono e toru. I puta mai ai tēnei rautaki i te wā e hora haere ana te mate urutā. He iti ngā rauemi i taua wā, he karanga ohorere. I te iti o ngā hangarau me te kore mōhio tika ki te rāweke hangarau matihiko, ka puta te whakaaro kia whakamahia ai ngā rauemi me ngā matū kei ngā kāinga o ngā tamariki e hora ana. Nā aua rauemi tonu i whakatutuki i ngā akoranga me ngā mahikāinga.

Ehara i te mea he huarahi ako tēnei mō ngā wā katoa, engari, mō ngā wā e tika ana. 

Hei whakatauira ake:

I tukua ngā tohutohu e ngā kaiako ki ngā tamariki katoa mā te īmera, mā te ringa, mā te akomanga kūkara rānei hoki. He hanga wharau te mahi.  

Ko te mea nui, ko te mahitahi a te tamaiti me tōna anō whānau ki te kohi matū i ō rātou kāinga noho ki te hanga i tēnā wharau. Tui atu ki ngā tohutohu nei, me āta hopu haere i ngā nekeneke o tō tēnā tamaiti hanga wharau. Ka whakaemi i ngā kohinga kōrero me ngā hopunga ataata, whakaahua hoki ki tētehi tūmomo whakaaturanga atahiko. Mutu ana te whakariterite whakaaturanga, ka tuku ki ngā kaiako kia mākahia. 

Te putanga iho:

• Mahi ngātahi, Mahi ā-whānau

• Mana motuhake

• Tuku ihotanga

• Mahi auaha

• Mahi Rapanga

• Mahi pārekareka

Ka puta he wheako whaiaro hei puna maumahara mō rātou. Ka whakatupuria rātou ki tēnei mea te whakaaro waho atu i te pouaka me te whakamātau pūkenga rapanga. He whakaū i te whakaaro ko te ao tonu tō akomanga. 

Ngā akoranga whai pānga: Te Reo, Pangarau, Hangarau, Hauora, Pūtaiao, Hākinakina, Hangarua, Tikanga ā-iwi.

Ngā Āhuatanga o Te Ako Ararau

3.1  Mokowā

Ki-Naianei – Hanga Wharau i te Kāinga

Nā te noho taratahi o te motu whānui i te wā o te kōwheori, i whakaritea he akoranga mō te akonga e tāea ai e ia te whakatutuki mahi i roto tonu i tōna ake whare, i tōna ake wā. He mea whakarite pēnei ai kei tūpono pahure he wā roa e kore kōrero tahi anō ai te kaiako me te tamaiti.

3.2  Taiao Ako

Āhuru Ako – Kāinga

Ko te nuinga o ngā mahi i oti i ngā tamariki, he mea whakakapi e rātou i te kāinga, ki tā rātou i tohu ai. Ka mahi i ngā mahi o te whare i te tuatahi, kātahi ka huri ki te whakaoti mahi mō te kura.

3.3  Rautaki Whakaako

Ko te puna mirimiri o te kāinga te hunga hāpai i te tamaiti. Ki te tautoko te whānau i te tamaiti ka eke tana wheako. Ina hīkaka ana te tamaiti ki te mahi i āna mahi, ka kitea, ka rāngona e ia ngā hua. Mā te aha i te ngana.

3.4  Rauemi Ako

Ko te rorohiko me te ipurangi mō ngā hangarau matihiko. He tūmomo kāmera ki te hopu ataata, whakaahua mō te whakaaturanga. Ko ngā matu o te taiao o te kāinga ō tēnā, ō tēnā.