Te Kura Akonga O Manurewa

Ngā Mātāpono o Te Ako Ararau

He ngākau tūwhera tō te kura, he tamaiti takiwātanga, he tamaiti turi kei reira e ako ana.

Ahakoa ko wai, he wāhi tōna kei roto i te kura, he mana tōna. Me mārama te tamaiti ki tana tūranga i te kura, me mārama hoki ngā tamariki katoa he mana motuhake tō ia tamaiti. 

He tikanga tā te kura mō te tamaiti takiwātanga. Ina raru te tamaiti, ka noho ia ki te tūrū, he wāhi āhuru tēnā mōna, ā, kua mōhio hoki ngā tamariki ki te waiho i tēnā tamaiti kia mauri tau anō a ia.

He tikanga tā te kura mō te tamaiti turi. Me whakangungu ngā Kaiako ki te reo rotarota Māori hei hāpai i ngā ākonga turi. 

Mā pango, mā whero ka oti ai te mahi.

Hei whakatauira ake:

Whakamahingia ana e te kura te taupānga kēmu Mahimaina (Minecraft) hei rautaki ako ararau pai, hei taiao ako motuhake hoki mō ā rātou ākonga. He mahi hei mahi ki hea ki hea.

He kēmu auaha te Mahimaina, he mea whakakorikori i te hinengaro kia whānui te titiro whakawaho atu i ngā pae takuahi. Ka tukuna e te Kaiako he kaupapa ki ngā ākonga mā rātou e hanga ki tā rātou i pai ai. 

Mā te whai wheako tonu e ako haere ai te akonga i tua atu i tēnā i whakaritea e te kaiako. Ko te wāhi ki te kaiako, he whakatō i te kākano hei kai mā te hinengaro. Ko te wāhi ki te akonga, he whakakikokiko, he whakaatu i ō rātou whakaaro ki te nui o tō rātou kaha hei tāhuhu kōrero mō rātou anō. 

Te putanga iho:

• Mahi auaha, mahi waihanga

• Mahi takitahi, takitahi – ki ngā hoa ako

• Whakapiki wairua, whakapiki mauri

• Iho pūmanawa

• Motuhaketanga

• Raweke hangarau

• Koanga ngākau

Ko te tū a te akonga i tana mana motuhake ki te whakaatu i ōna iho pūmanawa i roto i tētehi taiao ako haumaru, tētehi taiao ako tika me ngā rauemi e whai tikanga ana kia eke panuku te akonga.

Ngā akoranga whai pānga: Te Reo, Pangarau, Hangarau, Pūtaiao, Tikanga-ā-iwi, Ngā Mahi-ā-Rēhia.

Ngā Āhuatanga o Te Ako Ararau

2.1  Mokowā

I-Naianei – Mahimaina

Kua whakaritea tētehi wahanga o te wātaka o te kura e aro ai te tamaiti ki tana auahatanga. Ka noho tahi te tamaiti ki te kaiako ako ai i ngā nekehanga o te taupānga me ētehi atu tikanga whai pānga ki ngā kaupapa e whakahaerehia ana mō te mahimaina.

Ki-Naianei – Mahimaina

Ka tukuna ngā mahi e te kaiako ki ngā tamariki hei mahikāinga mā rātou. Mā ngā kaupapa o roto tonu i te whare o te tamaiti me tōna whānau e tohutohu i te wā e wātea ai te tamaiti ki te whakatutuki i āna mahi.

2.2  Taiao Ako

Puna Ako – Kura

Ko te kura tētehi wāhi kua whakaritea hei wāhi ako i te mahimaina.

Āhuru Ako – Kāinga

Ko te kāinga hoki tētehi atu wāhi kua whakaritea hei wāhi ako i te mahimaina.

2.3  Rautaki Whakaako

Puna Ako – Kura

He mahi takitini. Ka tāea e ngā tamariki me ngā kaiako te kotahi atu ki te ao o te mahimaina i te wā kotahi i runga i te punaha ipurangi o te kura, ki konei whakawhanaunga ai, whakawhitiwhiti whakaaro ai, wānanga ai i ā rātou kaupapa o te wā.

Āhuru Ako – Kāinga

He mahi takitahi. Ka noho takitahi te tamaiti ki tōna ake whare mahi ai i te mahimaina.

2.4  Rauemi Ako

He rorohiko, he ipurangi ki te kura me ngā kāinga o ngā tamariki.